Швейцарь – Хүнд үед тусалж ирсэн хуучны анд

Швейцарийн олон улсын хүмүүнлэгийн болон хөгжлийн тусламжийг хэрэгжүүлэгч Холбооны Гадаад хэргийн яамны харъяа Швейцарийн хөгжлийн агентлаг (ШХА) нь Монгол Улсад анх зуданд нэрвэгдсэн малчдад зориулсан төрөл бүрийн хүмүүнлэгийн хөтөлбөрөөр үйл ажиллагаагаа эхэлсэн. Гамшигт нэрвэгдсэн малчдад өвс тэжээл, эм тариа, хувцас хунараар туслахаас гадна амьжиргааны эх үүсвэр болсон малаа бүгдийг нь зуданд алдсан малчдад зориулсан бэлэн мөнгөний тусламжийг анх удаа Монгол Улсад хэрэгжүүлсэн билээ. “Малчдад зориулсан бэлэн мөнгөний тусламж” төсөл нь маш амжилттай хэрэгжиж, цаашид бэлэн мөнгөний тусламж хэрэгжүүлэхэд загвар болсон юм.

Зудын дараа ч Швейцарийн хөгжлийн агентлаг Монгол Улсыг чөлөөт зах зээлийн эдийн засгийн тогтолцоонд шилжих нийгэм, эдийн засгийн шилжилтийн үед нь дэмжин ажиллахаа илэрхийлж, үйл ажиллагаагаа хүмүүнлэгийн тусламжаас хөгжлийн урт хугацааны хөтөлбөр рүү хандуулж, өнөөг хүртэл Монгол орон даяар нүүрлэсэн ядуурлыг бууруулах, хөдөөгийн иргэдийн амьжиргааг дээшлүүлэх чиглэлээр Монгол Улсын Засгийн газартай хамтран ажиллаж байна.

Монгол улс сүүлийн арав гаруй жилийн туршид шилжилтийн дараах эдийн засаг болон улс төрийн амжилтаараа олон улсын анхаарлыг ихэд татсан бөгөөд өдгөө дэлхийн хамгийн залуу ч хурдацтай хөгжиж буй ардчилсан орнуудын тоонд зүй ёсоор ордог. Улс төр, эдийн засгийн болон байгаль цаг уурын тааламжтай нөхцөлүүд нь эдийн засгийн хөгжилд ихээхэн түлхэц үзүүлсэн билээ. Монгол Улс нь байгалийн эрдэс баялгаар арвин бөгөөд сүүлийн жилүүдэд уул уурхайн салбар эрчтэй хөгжиж, үүнээс улбаалан ирэх 10 жилд улсын эдийн засаг 8-10 хувиар өсөх өндөр магадлалтай юм.

Хэдийгээр Монгол улс эдийн засгийн хувьд өсч хөгжиж байсан ч үүний зэрэгцээ ядуурлын түвшин нэмэгдсэн бөгөөд ард түмний амьжиргааны түвшинг сайжруулах тухайд төдийлөн амжилттай байж чадаагүй. Өнөөдрийн байдлаар орон нутгийн хоёр өрхийн нэг нь ядууд тооцогдож, хот хөдөөгийн ялгаа эрс нэмэгдэж байна. Энэхүү эрс ялгаа нь орлогын болон хүйсийн тэнцвэргүй байдалд хүргэж, улмаар эрүүл мэнд, боловсрол, нийгмийн халамжийн үйлчилгээнд хамрагдаж чадахгүй байх зэрэг бэрхшээл үүсгэдэг. Уул уурхайн салбараас олох орлого ихсэхийн зэрэгцээ авилга, хээл хахууль газар авч, Монгол улс “баялгийн хараал”-д нэрвэгдэх вий гэсэн зовнилийг олон нийтэд төрүүлж байгаа аж.

Монгол улс мөн байгаль орчны олон асуудалтай тулгарч байна. Дэлхийн дулаарлаас гадна бэлчээрийг хайр гамгүй, даац хэтрүүлэн ашиглах зэрэг нь бүхий л нутгийг хамарч байгаа бөгөөд олон монголчуудын амь зуулгад аюул авчирч, ялангуяа хөдөө аж ахуйн салбарт ус, бэлчээр, тариалангийн газар, мөн хувиараа ашигт малтмал олборлох зэргээр байгалийн нөөцөд тулгуурлан амьдардаг иргэд, малчдад сөргөөр нөлөөлж байна.

Швейцарийн хөгжлийн агентлаг нь Монгол улсад уул уурхайн гэнэтийн өсөлт хөгжлөөс улбаалан бий болох эдийн засгийн асар их хүчин чадлаа тогтвортой хөгжилд хүргэхэд нь туслан дэмжихийг эрхэм үүрэг хэмээн үзэж байна. Энэ утгаараа, Швейцарийн хөгжлийн агентлаг нь малчдын амьдралд туслах, түүнчлэн ядуурал хамгийн их тархсан Монгол Улсын алслагдсан баруун бүсийн иргэдийн амьдралыг сайжруулахад түлхүү анхаарч ажилладаг.

Швейцарь улсаас Монгол улсад үзүүлж буй буцалтгүй тусламж